У Віцебску з’явіліся догхантэры?
У Віцебску з'явіўся чалавек, які палюе на сабак з пнеўматычным пісталетам. Аб гэтым ў сацыяльных сетках расказала маладая жанчына, сабака якой ледзьве не стаў ахвярай догхантэра.
Настасся піша, што мужчына, якому на выгляд было каля сарака год, стрэліў ў сабаку з пнеўматыкі, калі праязжаў міма яго на ровары. Сабака не брахаў, не кідаўся на раварыста і ніякім чынам не выказваў агрэсіі. Муж Настассі паспрабаваў дагнаць хулігана, але той хутка з'ехаў.
Зараз Настасся лечыць свайго сабаку, ў якога вялізная гематома на тым месцы, куды трапіла "куля". Калі б догхантэр быў трапнейшым, сабака мог застацца без вока.
У праваахоўчыя органы Настасся не звярталася, бо не верыць, што міліцыянты знойдуць хулігана і наогул не ўпэўнена, што яны зоймуцца гэтай справай.
Здарэнне адбылося днямі на вуліцы 6 Загараднай.
