На свята “Лялькі” прыедуць калегі з Украіны
З 19 па 22 красавіка Беларускі тэатр “Лялька” будзе святкаваць свой дзень нараджэння. Сёлета тэатру споўніцца 27 гадоў.
"Лялька" распачалася як маленькая трупа пры Нацыянальным акадэмічным драматычным тэатры і вырасла ў вялікі калектыў з трупай у 16 чалавек. Тэатр не спыняецца на дасягнутым і заўжды імкнецца здзівіць і парадаваць сваіх прыхільнікаў.
Да сёлетняга свята "Лялька" падрыхтавала разнастайныя забаўляльныя праграмы для дзяцей і дарослых.
19 красавіка ў 18.00, перад спектаклем “Дэкамерон”, адбудзецца вечар песень Аляксандра Вярцінскага ў выкананні артыста тэатра “Лялька” Сяргея Талкача, а таксама Наталлі Кірпічэнка. Перад пачаткам праграмы гледачоў чакае таксама выступ навучэнцаў Віцебскага дзяржаўнага каледжа імя І.І.Салярцінскага.
Калектывы Віцебска парадуюць дзетак 20 красавіка ў 10.30 падчас канцэртнай праграмы “Чароўны падарунак” перад спектаклем “Брэменскія музыкі”. У гэты дзень выступяць вучні школы №33 Віцебска з музычным ухілам, тэатр моды “Наш стыль”, спартыўная студыя “Драйв”. Акрамя таго, усіх дзяцей на выхадзе з тэатра будзе чакаць салодкі падарунак.
20 красавіка ў 18.00 госці тэатра апынуцца ў атмасферы ХІХ стагоддзя і патрапяць у шляхецкі салон, на якім можна будзе адпачыць, паразмаўляць, пачытаць свежыя навіны 1812 года ці прагледзець за кубачкам гарбаты часопіс мод 1812-1813 гадоў, а таксама пагуляць у настольныя і картачныя гульні таго часу (“Бірулькі”, “Да бою!”, “Польскія шашкі”, “Яўрэй”, “Парася”), пабачыць старадаўнія танцы, пагуляць у папулярную два стагоддзі таму гульню “Жывыя карціны”. У праграме таксама выступ навучэнцаў Віцебскага дзяржаўнага каледжа імя І.І.Салярцінскага. Пасля забаўляльнай праграмы будзе паказаны спектакль “Нататкі вар’ята”.
Трэці дзень свята, 21 красавіка ў 10.15, распачне духавы аркестр, які выступіць на пляцоўцы перад тэатрам. Свята працягнуць гульні ў фае, у якіх могуць паўдзельнічаць усе жадаючыя маленькія наведвальнікі, якія набылі квіткі. У 10.30 дзетак чакае танцавальна-забаўляльная праграма “Хвілінкі-весялінкі”, на якой яны сустрэнуцца, пагуляюць і патанчаць са знакамітымі героямі казкі Астрыд Ліндгрэн – Карлсанам і Фрэкен Бок. Пасля святочнай праграмы дзеці пабачаць прэм’ерны спектакль “Тук-тук! Хто там?”.
Гульні і танцавальна-забаўляльная праграма будуць паўтораны ў гэты ж дзень перад спектаклем на ўкраінскай мове “Івасік-Тэлэсік” гасцей тэатра “Лялька” з горада Хмяльніцкі (Украіна). Пачатак забаўляльнай праграмы - а 14-й, спектакль пачнецца ў 14.30.
У панядзелак, 22 красавіка ў 11.00, будзе паказаны спектакль на ўкраінскай мове “Чароўная лямпа Аладзіна” тэатра лялек з горада Хмяльніцкі. У гэты дзень перад спектаклем прагуць кампазіцыі на цымбалах у выкананні ансамбля “Забава” музычнай школы №4 г.Віцебска.
Падчас святкавання дня нараджэння тэатра таксама пройдзе выстава паштовак з віншаваннямі на беларускай мове, якія даслалі маленькія аматары Беларускага тэатра “Лялька”.
