Посуд, з якога ела і піла шляхта
Выкшталцоны посуд – сталовыя сервізы, кававыя і чайныя наборы, вазы, куфлі, разнастайныя фігуркі з фарфору ды фаянсу– прадстаўлены на выставе "Польская кераміка XVIII-ХХ стст.", якая адчынілася 11 красавіка ў Віцебскім абласным краязнаўчым музеі.
Гэта выстава “завочна” знаёміць жыхароў нашага горада з адным з вядучых музеяў у Польшчы – Верхнесілезкім музеем у Бытоме. Яму ўжо больш за стагоддзе (заснаваны ў 1910 годзе). Сёння ягоныя калекцыі налічваюць каля паўтара мільёна прадметаў з самых розных раздзелаў – археалогіі, этнаграфіі, гісторыі, прыродазнаўства, выяўленчага і дэкаратыўна-прыкладнога мастацтва.
У экспазіцыі прадстаўлены вырабы сілезскіх керамічных і фарфоравых фабрык ад XVIII да XX стагоддзя ўключна – гэта мануфактуры ў Прушкаве, Глініцы, Раціборы, Цмелеве, Пацыкаве і інш.
Выставу арганізавалі Верхнесілезскі музей у Бытоме, Польскі інстытут у Мінску, Нацыянальны мастацкі музей Беларусі і Віцебскі абласны краязнаўчы музей.
Наведаць яе можна да 3 чэрвеня.