Краязнаўчы музей збірае цацкі для сірот і правядзе дзень нараджэння плюшавага мішкі
У Віцебскім абласным краязнаўчым музеі 26 кастрычніка адкрыецца выстава, галоўным героем якой стане плюшавы мішка. 
Аказваецца, у сябра дзяцей таксама ёсць дзень нараджэння – 27 кастрычніка. Сусветны дзень плюшавага мішкі адзначаюць з 2002 года. Сёлета цацка будзе святкаваць, вы не паверыце, 110 гадоў з моманту свайго ўзнікнення.
Як паведамляецца на сайце краязнаўчага музея, падчас адкрыцця выставы адбудзецца пазнавальна-забаўляльная праграма для сірот.
Арганізатары таксама падрыхтавалі дабрачынную акцыю «Падары цацку дзецям». За два тыдні, якія засталіся да мерапрыемства, кожны жадаючы можа прынесці ў ратушу цацкі. На адкрыцці выставы іх падораць выхаванцам прытулку і дзіцячага дома.
