Мосар запрашае на сусветны Дзень цвярозасці
Падтрымліваючы традыцыю ў першую суботу кастрычніка, калі ў 2007 годзе ўжо памерлы ксёндз Юозас Булька разам з прадстаўнікамі групаў Ананімных алкаголікаў (АА) з Беларусі і замежжа заснавалі Алею цвярозасці, кожны год праводзіцца ўрачысты Дзень цвярозасці. Сёлета прыпадае 5-годдзе Алеі цвярозасці – маленькі юбілей.
У нашым касцёле ў Мосары, кожную 2-ю нядзелю месяца, у 13.00 адбываецца малітва аб цвярозасці нашых сем’яў, моладзі і нашага беларускага народу. Молімся ва ўсіх інтэнцыях, якія дасылаюць людзі, перад рэліквіямі святога Юстына.
З 2008 года Мосар таксама з’яўляецца зонай цвярозасці.
У 2010 годзе, у першую суботу кастрычніка, адбылася канферэнцыя аб цвярозасці і была ўрачыста асвечана фігура Церпячага Хрыста на Алеі цвярозасці. У 2011 годзе ў Глыбоцкім раёне праходзіў Тыдзень цвярозасці.
У гэтым годзе запрашаем усіх жадаючых 6 кастрычніка, калі адзначаецца Сусветны дзень цвярозасці, адзначыць юбілей Алеі цвярозасці ў Мосары. Урачыстая літургія з працэсіяй і святкаванне адбудзуцца ў 18 гадзін.
Сардэчна ўсіх запрашаем на ўрачыстасць!
Вызвалім беларускі народ ад алкагольнага генацыду малітвай у Мосары!
