Дзевяць ледзяных скульптур упрыгожылі галоўную плошчу Віцебска
У Віцебску прайшоў другі адкрыты гарадскі конкурс ледзяных скульптур, у якім прынялі ўдзел шэсць каманд. Галоўныя вынікі конкурса — дзевяць фігур з ільда — будуць радаваць віцебскую дзятву, пакуль не пацяплее.
У гэтым годзе першае месца было прысуджана двум камандам і, адпаведна, уручана два дыпломы. Найбольш майстэрскі былі выкананыя фігуры каманды Віцебскага дзяржаўнага ўніверсітэта — дракон і мамант. Скульптура маманта, да таго ж, адзіная з дзвяці была з сюжэтам — калі прыгледзіцца, то пад вялізным зверам можна ўбачыць раздушанага чалавека.
А вось каманда аддзела адукацыі, якая таксама стала першай, традыцыйна выкарыстала модны віцебскі трэнд — акрамя зубра, яны зрабілі артылерыста з пушкай часоў вайны 1812 года. Дзіўна толькі, што скульптура была без вензеля Александра I. Нагадаем, што ў мінулым годзе гэта каманда перамагла, зрабіўшы ладдзю княгіні Вольгі.
На другім месцы апынуліся прадстаўнікі Віцебскага дзяржаўнага тэхналагічнага каледжа. Яны таксама зрабілі дзве фігуры — лебедзя і грыфона.
За скульптурную кампазіцыю - кабрыялет, побач з якім стаіць кіроўца - трэцяе месца прысудзілі камандзе Віцебскага дзяржаўнага тэхнічнага каледжа. На гэтай скульптуры можна пасядзець і патрымацца за руль. Яна адразу спадабалася гуляючым гараджанам, якія, праўда, пачалі спрачацца, як яе лепей назваць: “Дзізялёк замерз” або “Стоп бензін”.
Акрамя прызёраў, у конкурсе таксама ўдзельнічалі каманды аддзела культуры гарвыканкама і Віцебскага дзяржаўнага тэхналагічнага ўніверсітэта. Яны атрымалі дыпломы.
На жаль, трэба адзначыць, што, хаця конкурс праводзіўся другі раз, а скульптуры на плошчы ўсталёўваюць ужо трэці раз, лёд быў зноў нізкай якасці. Яго не залівалі спецыяльна, а перад самым конкурсам здабылі на адным з вадаёмаў Віцебшчыны. Хаця, здавалася б, моцныя маразы якраз спрыялі падрыхтоўцы ледзяных глыб вялікага памеру адмыслова для конкурса.
Арганізатарам конкурса, як і ў мінулым годзе, выступіў аддзел па справах моладзі і абаронна-мабілізацыйнай працы Віцебскага гарадскога выканаўчага камітэта.