Віцебскія аўтамабілісты працягваюць лічыць пешаходныя вуліцы дадатковымі паркоўкамі
Пешаходныя вуліцы Крылова і Талстога ў Віцебску некаторыя недобрасумленныя аўтамабілісты выкарыстоўваюць для паркоўкі асабістых аўтамабіляў.
“Народныя навіны Віцебска” некалі ўжо пісалі пра праблему стыхійнай паркоўкі на вуліцы Крылова. Тады аўтамабілі адтуль зніклі, а ўезд з боку Політэхнічнай быў нават заблакаваны бетоннымі кветнікамі.
Прайшоў час, кветнікі некуды зніклі, а машыны на пешаходнай вуліцы з’явіліся зноў. Адметна, што многія з іх належаць супрацоўнікам праваахоўных органаў, якія, па ідэі, павінны ахоўваць правапарадак, а не парушаць яго.
Яшчэ адна незаконная паркоўка з’явілася на вуліцы Талстога. Хто там паркуецца — супрацоўнікі мясцовых офісаў ці іх кліенты — цяжка сказаць, але бачна, што людзі дужа занятыя і важныя: пакінуць машыну на плошчы Свабоды яны не могуць.
Калі на Крылова машыны могуць трапіць з Політэхнічнай вуліцы, то на Талстога яны едуць па пешаходнай жа вуліцы Суворава, ствараючы небяспеку для шпацыруючых па старым горадзе віцяблян і гасцей абласнога цэнтра.
