У паўночным супрацьстаянні ХК “Віцебск” выйшаў пераможцам
Трыма ачкамі папоўнілі сваю скарбонку віцебскія хакеісты, абыграўшы на выездзе наваполацкі “Хімік-СКА”.
Нягледзячы на тое, што першы перыяд завяршыўся з лікам 1:2 на карысць віцяблян, гэты адрэзак гульні выдаўся для нашых землякоў вельмі складаным. Гаспадары ільда аказвалі сур’ёзны ціск на браму Артура Лук’янава і аднойчы ў большасці дабіліся поспеху. Пераламіць ход гульні нашым хлопцам удалося дзякуючы удаленням, якіх “Хімік-СКА” нахапаў хвілін за пяць да першага перапынка. Гуляючы ў большасці, “Віцебск” не толькі зраўняў лік, але і выйшаў наперад. Парытэт усталяваў Данііл Арлоў. Каб зафіксаваць узяцце варот пасля кідка Данііла, галоўнаму рэферы Андрэю Васько давялося звярнуцца да відэапрагляда. Праз невялічкі час наперад сваю дружыну вывеў Павел Волчак.
У другім перыядзе у навапалачан хоць і не атрымлівалася дзейнічаць так напорыста, як у першыя 20 хвілін, але яны двойчы дабіліся поспеху, і заключную трэць матча каманды пачалі пры ліку 3:2.
На шчасце віцебскіх заўзятараў (а іх у Наваполацк прыехала чалавек 20), трэці перыяд быў за “мядзведзямі”. Яны зноў зраўнялі лічбы на табло і павялі ў ліку. Больш чым за хвіліну да фінальнай сірэны “Хімік-СКА” мяняе варатара на шостага гульца. Мясцовыя трыбуны актыўна падбадзёрваць сваіх хакеістаў. Шайба гасцюе ў зоне віцяблян. Камусьці з віцебскай дружыны ўдаецца выкінуць яе адтуль. Шайба скальзіць па ільду ў асірацеўшыя вароты гаспадароў, але спыняецца побач з лініяй. “Хімік-СКА” ідзе на апошні штурм, каб перавесці гульню ў овертайм, але безвынікова. 3:4 – перамога за “Віцебскам”!