Памёр паэт ураджэнец Аршаншчыны Янка Сіпакоў
10 сакавіка на 75 годзе жыцця не стала беларускага паэта, нашага земляка Янкі Сіпакова.
Большасці людзей нябожчык быў вядомы як паэт, але ж пакінуў ён пасля сябе яшчэ і апавяданні, і нарысы, і пераклады. Шырокая перакладчыцкая дзейнасць – перакладаў як Пушкіна і Міцкевіча, так і У. Ўітмэна ды Хо Шы Міна – засталася ў цяні яго паэтычнага таленту. Але таленавіты чалавек – таленавіты ўва ўсім.
Свой жыццёвы шлях Янка пачаў у Аршанскім раёне ў вёсцы Зубрэвічы 15 студзеня 1936 года. Бацькі былі расстраляныя за сувязь з партызанамі, і будучаму пісьменніку давялося самому забяспечваць сваё існаванне – яшчэ дзіцём ён пайшоў працаваць паштальёнам. Ужо ў школьныя гады ў раённай аршанскай газеце “Ленінскі прызыў” быў апублікаваны першы верш. Па сканчэнні школы лёс звязаў Сіпакова з літаратурай непасрэдна. У 1954 годзе Сіпакоў працаваў літаратурным работнікам у Шклоўскай раёнцы “Чырвоны барацьбіт”. А па сканчэнні журналісцкага аддзялення БДУ літаратура зацягнула цалкам. Распачалася сур’ёзная праца ў часопісах “Вожык”, “Маладосць” і, канешне, напісанне ўласных твораў. 12 кніг паэзіі і 9 кніг прозы былі створаныя і выдадзеныя аўтарам за час яго жыцця. Але ж і жыццё калі-небудзь сканчаецца.
Вечная памяць паэту-земляку!
