Памёр Ёзас Булька
Сёння на 85-м годзе жыцця памёр вядомы каталіцкі святар Ёзас Булька, які служыў у касцёле Святой Ганны ў вёсцы Мосар Глыбоцкага раёна. Ксёндз сканаў у мінскай бальніцы пасля паўторнай аперацыі на сэрцы. Пахаванне святара адбудзецца 11 студзеня ў 11 гадзін у вёсцы Мосар.
У Мосары, які Булька са звычайнага п’янага калгаса пераўтварыў у сапраўдны “беларускі Версаль”, прайшлі апошнія 19 гадоў жыцця святара. Мясцовыя жыхары бачылі ў ягонай асобе вялікі аўтарытэт – ксёндз Ёзас адвучыў ад п’янства цэлы сельсавет, стварыў у Мосары музей цвярозасці, пасадзіў Алею цвярозасці, пасадзіў і даглядаў унікальны парк. У суседняў вёсцы Парыж па ягонай ініцыятыве ўзвялі “Эйфелеву вежу” і адчынілі музей Яна Паўла ІІ.
У 2005 г. Ё.Булька стаў першым каталіцкім святаром у Беларусі, які атрымаў прэмію беларускага прэзідэнта Аляксандра Лукашэнкі “За духоўнае адраджэнне”.
Нягледзячы на паважаны ўзрост, святар быў увесь час на нагах і выношваў безліч планаў. Напрыклад, усталяваць сувязь паміж жыхарамі вёскі Парыж і французскай сталіцай, адкрыць у Мосары Алею юнацтва, добраўпарадкаваць набярэжную мясцовай рачулкі Маргва, паставіць помнікі Адаму і Еве і інш.
Не выключана, што здароўе і сілы святара падарваў буйны скандал у мінулым годзе – СМІ абвінавачвалі яго ў супрацоўніцтве з камуністычнымі спецслужбамі ў Літве, дзе Булька жыў да таго, як стаць святаром.
